BLOQUE 7 – Proyectos europeos – Memoria 2021 Ihobe

Europako proiektuak

Urban Klima 2050 LIFE proiektu integratua da Euskadin hurrengo urteetan ekintza klimatikoari dagokionez indarrean izango den egitasmo handiena. 19,8 milioi euroko inbertsioaren eta 20 erakunde kideren bitartez, proiektuak 40 ekintza zehatz gauzatzea proposatzen du, bost bloketan antolatuta, klima-aldaketa arintzeko eta horretara egokitzeko euskal lurraldean.

2021ean proiektuaren bidez argitaratu dira zazpi txosten, tresna edota ezarpen material; antolatu dira hiru mintegi tekniko, herritarrak kontzientziatzeko kanpaina bat eta proiektuko aurrerabidea jakinarazteko nazioarteko hiru ekitaldi, horietako bi Glasgowko COP26n.

Europako Batzorderen babesaz, Horizon 2020 programaren markoan, AGREE proiektuaren xedea da inbertsioak sustatzea Euskadiko etxebizitza-eraikin pribatuen eraginkortasun energetikoa eta bertako biztanleen bizi-kalitatea hobetzeko. Eusko Jaurlaritzaren Etxebizitza Sailak zuzentzen du proiektua Gasteizko, Donostiako eta Basauriko udalekin, Ihoberekin eta Tecnaliarekin lankidetzan.

2021ean proiektua Donostian aurkeztu da, Luistarrak, Gaztelu eta Zarategi inguruetan, eta Gasteizko Adurtza eta San Kristobal auzoak eta Basauriko Federico Mayo birgaitzeko azterketak egin dira, 8,5 milioi euro inguruko inbertsioa lortze aldera, 2022rako urtean 250 tona CO₂ baliokide gutxitzeko helburuaz.

Proiektuak biltzen ditu Europako hamar herrialdetako 35 erakunde, eraikuntzaren sektorean ekonomia zirkularra txertatzeko prozesuan aurrera egiteko. Ihobek proiektuko komunikazio- eta dibulgazio-jarduerak zuzentzen ditu.

2021ean, bere ibilbideko lehen urtean Iceberg proiektuak tresna funtzionalak garatu ditu eraikinak azkar digitalizatzeko beren bizitza baliagarriaren amaieran; eraispenen planifikazioa hobetzeko eta hondakinak zehatzago kuantifikatzeko eta identifikatzeko; eta trazabilitatea zehazteko eraikuntzako eta eraispeneko materialen zirkulartasuna hobetze aldera.

Adapyr proiektua Klima Aldaketaren Pirinioetako Behatokiak (OPCC) zuzentzen du eta xede dauka behaketa, kapitalizazioa, transferentzia eta Pirinioetan klima-aldaketara egokitzeko jardunbide egokiak bereganatzea mugaz gaindiko testuinguru batean. Ihobe proiektuko kidea da beste hamaika erakunderekin batera, eskualdekoak, estatukoak eta nazioartekoak.

Proiektuaren ekintza nagusiei dagokienez, 2021ean Klima Aldaketaren Pirinioetako Estrategia argitaratzeko lana amaitu zen. 2050erako ikuspegia zehazten du, baita Pirinioetako erronka eta jarduketa ildoak ere, klima-aldaketari dagokionez.

Area Science Park Italiako agentziak koordinatzen duen POSIDON egitasmoak nazioarteko hamar erakunde biltzen ditu lurzoruaren kutsadurarako irtenbide berritzaileak eta jasangarriak identifikatzeko, egokiak eta errentagarriak. Ihobe proiektuarekin lankidetzan ari da kide tekniko moduan. Europako Horizon 2020 programaren parte da.

2021eko bigarren erdian, POSIDON proiektuaren 2. fasea amaitu zen arrakastaz, eta irailean 3. faseari ekin zitzaion, 2022ko martxoan amaitzea aurreikusita duena.